`S gibbt uff dr Walt kee eenzges Fleckel

wie unse Äberlausitz is.

Nee, sucht´ch oack su a schienes Eckel,

do findt´r kees, doas ist gewieß.

Drum zoigt´s mich immer mih

noa menner Heemte hie!

Zengsrim de Barge gruß und kleene:

dr Kupper und dr Bieleboh,

dr Schlaichtebarg, de Kälbersteene,

doas leit euch oalls su schiene do.

Drum zoigt´s mich immer mih

noa menner Heemte hie!

Saht´ch oack de hibschen kleenen Häusel

durt ub´m a dr Lahne droa!

An Gartel loichten Boalsaminel,

do hot ees urndlch Freede droa!

Drum zoigt´s mich immer mih

noa menner Heemte hie!

Und woas for hibsche zoarte Maidel

tutt´s do a unsen Bargen gan!

Su knusperch wie neubackne Sammeln

´s koann´ch enner goar ne soat droa sahn!

Drum nahm´ch mer groade die,

weil´ch do derheeme bie!

Und o die Karln, die senn ne iebel,

a brinkel groob und groaderaus.

De richt´ge Fourrsche steckt an Knuchen,

sahn se o moanchmol eefällch aus.

A sicker Karle do,

dar krickt jed´s Maidel o!

Drum itz ne lange rimgesickelt,

schoafft´ch jed´s oack su a Maidel oa!

Zieht rei als Häusel a dr Lahne

Und saht´ch de Heemt vu durt aus oa!

Do zoigt´s euch immer mih

Noa unser Heemte hie,

noa unser Lausitz hie!